რა უნდა გავითვალისწინოთ სახლის დაპროექტებისას?

კვლევის მიხედვით ადამიანები ცხოვრების 90% დახურულ სივრცეში ვატარებთ, აქედან 70% კი საკუთარ სახლში, ამიტომ აუცილებელია იქ თავს მაქსიმალურად კომფორტულად ვგრძნობდეთ.

ამ სტატიაში მოკლედ განვიხილავ ფაქტორებს, რომლებიც მნიშვნელოვანია საკუთარი სახლის ისე დასაპროეტებლად რომ მივიღოთ კომფორტული, პრაქტიკული  და ენერგოეფექტური საცხოვრებელი სივრცე.

სახლისა და ეზოს განაწილება

სახლის ნაკვეთზე განთავსებისას უნდა გავითვალისწინოთ მანქანის გასაჩერებელი სივრცე. ყურადღება უნდა მივაქციოთ მანქანიდან სახლამდე მისასვლელი გზის დაგეგმარებას, რათა უამინდობისა თუ ბარგის შემთხვევაში მთელი ეზოს გადაკვეთა არ დაგვჭირდეს.

აქვე გასათვალისწინებელია მყუდრო ეზოს მოწყობა, ინდივიდუალური სახლი ყველაზე დიდი ხიბლი ხომ სწორედ ეზოა. ეზოს სწორად დაგეგმარებაში მნიშვნელოვან როლს თამაშობს როგორც არქიტექტორი ასევე ლანდშაფტის დიზაინერი.

შენობის ორიენტაცია

სახლის გეგმარებისას პირველი რიგში უნდა გადაწყდეს შენობის ორიენტაცია – საით იქნება მიმართული მთავარი ფასადი? საით იშლება უკეთესი ხედი ან როგორ იქნება განლაგებული საძინებლები და მისაღები ოთახი უკეთესი განათებისთვის მისაღწევად?

განათება და განიავება საჭირო და მნიშვნელოვანია ყველა ოთახისთვის, თუმცა აქაც არსებობს პრიორიტეტები. მაგალითად:

• სასურველია ყველა ოთახს ორმხრივი განიავების შესაძლებლობა ჰქონდეს.
• სამზარეულო და სამუშაო ოთახი (სტუდიო) ჩრდილოეთით განთავსდეს – თანაბარი განათებისა და შედარებით გრილი ორიენტაციის გამო.

სწორად განლაგებული შენობა ბუნებრივად ენერგოეფექტურია. შედეგად, სეზონურად გაწეული კომუნალური ხარჯების მინიმუმამდე შემცირებაა შესაძლებელი.

განათება

გასათვალისწინებელია ინტერიერის და ექსტერიერის ურთიერთობა. დიდი ფანჯრები და ვიტრინები ბუნებრივი სინათლის წყაროცაა და ლამაზი ეზოს ელემენტებიც შემოაქვს ინტერიერში.

ოთახების გეგმარება

გეგმაზე მუშაობისას აუცილებელია გავითვალისწინოთ რომ ერთმანეთზე ფუნქციით დამოკიდებული ოთახები სასურველია ერთად დაჯგუფდეს, მაგალითად: მეტად მოსახერხებელია, როდესაც სამზარეულო ახლოს არის სასადილო / მისაღებ ოთახთან.

სწორად გეგმარების მისაღებად მნიშვნელოვანია გამართული ცირკულაცია, რაშიც დერეფნები გვეხმარება. თითქოს ცხადია, რომ საძინებლებს შესასვლელები ინდივიდუალური დერეფნიდან უნდა ჰქონდეს, თუმცა ბევრჯერ შეგვხვედრია საძინებლებში შესასვლელები სამზარეულოდან ან სხვა საძინებლებიდან.

რასაკვირველია ყველას თავისი შეხედულება აქვს კომფორტსა და იდილიაზე, თუმცა არსებობს ფაქტობრივად წესად ქცეული გამოცდილებები, რომლის გათვალისწინებაც აუცილებლად ღირს და რომლის ნაწილიც შევეცადეთ ამ სტატიით გადმოგვეცა.

თუკი ახლო მომავალში გეგმავთ საცხოვრებელი სახლის მშენებლობას და გაქვთ კითხვები ზემოთ ჩამოთვლილ თუ სხვა საკითხებზე, teamtwo მზადაა ნებისმიერ დროს კონსულტაცია გაგიწიოთ.