არქიტექტურა

როჯერსმა ადგილმდებარეობა საუკეთესო ხედებიდან გამომდინარე აირჩია, ვინაიდან მისი ერთ-ერთი მიზანიც ეს იყო, რომ გალერეას ჰქონოდა პეიზაჟი, რომელიც არსებულ ვენახებზე და ბუნებაზე გაიშლებოდა. სწორედ, ამ ჩანაფიქრმა განაპირობა შენობის კონსტრუქციული და არქიტექტურული ფორმა.

შედეგად, საგამოფენო სივრცის განლაგება და ფორმა ორიენტირებულია ოთახის უკიდურეს წერტილში არსებული ფანჯრისკენ, რომლის საშუალებითაც ხედი ერთგვარ ჩარჩოში ექცევა და ქრება ზღვარი შიდა და გარე საგამოფენო სივრცეებს შორის. ამ გზით, ვიზიტორი ზუსტად იმ შთაბეჭდილების ქვეშ ექცევა, რამაც გავლენა იქონია ავტორის კონცეფციაზე. თამამად შეიძლება ითქვას, რომ შენობა თავის მხრივ ექსპონატია, რომელიც არსებული ფორმით, ზედმეტი ჩარევების გარეშე, ინტეგრირდება გარემოსთან და შთამბეჭდავ სინთეზსს გვთავაზობს ბუნებასა და არქიტექტურას შორის.

რიჩარდ როჯერსის შემოქმედების მოყვარულებისათვის, არ იქნება უცხო ღია/მკვეთრი ფერის სტრუქტურული ელემენტების თვალსაჩინოება ფასადზე, რაც მის სავიზიტო ბარათად იქცა, ერთ-ერთი ყველაზე ცნობილი შენობის „პომპიდუს ცენტრის“ განხორციელების შემდეგ.

კონსტრუქცია

შენობა 27 მეტრის სიმაღლის ფერდობზეა გადმოკიდებული, რომელსაც გამაგრების მხოლოდ ოთხი საყრდენი წერტილი გააჩნია. როგორც არქიტექტორის სხვა ნამუშევრებს, ამ შენობასაც ახასიათებს სიცხადე და მკაფიოობა, ვინაიდან მარტივად გასაგებია თუ როგორ მუშაობს შენობის კონსტრუქცია და რისთვის არის საჭირო მისი თითოეული ელემენტი.

შენობის კონსტრუქციული შესრულება განაპირობებს, ნაგებობის 80%-ის ჰაერში გადმოკიდებას. ამ გზით, ავტორი მინიმალურად ერევა არსებულ რელიეფში და ინარჩუნებს ფერდობის ბუნებრივ ფორმებს.

ნაგებობა თავისი გაბარიტული ზომების და კონსოლის მიუხედავად საკმაოდ დახვეწილი, მკაფიო და მსუბუქი კონსტრუქციისგან შედგება. ეს ყველაფერი მიიღწევა იმის ხარჯზე, რომ ნაგებობის ორი საყრდენი წერტილი (სურ.1-კვანძი1) წარმოადგენს ე.წ. უძრავ სახსროვან კვანძს (სურ.2), რომელიც თავისი მოწყობის ტიპიდან გამომდინარე, კონსტრუქციას, მობრუნების საშუალებას აძლევს. ბუნებრივია, სახსრული კვანძი, თავის თავად ვერ შეძლებდა ამხელა კონსოლური ნაგებობის დაჭერას და სიმძიმისგან კონსტრუქცია ჩამოვარდებოდა. ამის საპირწონედ, კონსტრუქციას დამატებული აქვს დამჭერი ფოლადის ღეროები, ანუ ტროსები (სურ.1-კვანძები2;3 და სურ.3). შედეგად კონსოლის ზემოქმედებისგან ტროსები იჭიმება და უზრუნველყოფს სათანადო მდგრადობას.

ჰაი-ტექ არქიტექტურის (High-tech Architecture) პიონერისათვის, მთვარი მუშოაბის პროცესში არსებული სწორი კონცეფციის შემუშავება და შემდგომ მისი ფორმაში განვითარება იყო. რიჩარდ როჯერსის ნამუშევრები არქიტექტურისა და კონსტსრუქციული ნაგებობის შედევრებადაა მიჩნეული, სწორედ ამ ორი სფეროს დაბალანსებული სინთეზის შექმნიდან გამომდინარე.

ირაკლი გოგოხია
ბიზნესის განვითარების მენეჯერი