დღეს ვისაუბრებთ დატკეპნილი გრუნტის ტექნიკაზე (ინგ. Rammed Earth), რაც მართალია არ წარმოადგენს ახალ სიტყვას სამშენებლო სფეროში, თუმცა მისი დადებითი მხარეებიდან გამომდინარე, ბევრი დეველოპერისთვის საინტერესო ტექნოლოგიად რჩება.

მიწა, ცარცი, კირი ან/და მსხვილი ქვიშა ის ნედლეულებია რისი გამოყენებითაც დატკეპნილი გრუნტის მასალა მზადდება და იქმნება შენობის კედლები. გამოყენებული ნიადაგი პროცენტულად უნდა შეადგენდეს 70% ქვიშას და 30% თიხას, რიგ შემთხვევებში შესაძლებელია 10% წყლის დამატებაც.

კედლის ასაშენებლად საჭიროა ყალიბი, რომელშიც მიწა ეტაპობრივად იტკეპნება. კედლის სისქე ჩვეულებრივ 30 სანტიმეტრიდან იწყება. თერმოიზოლაციის გასაუმჯობესებლად, კედლის ზედაპირს ხშირად ამუშავებენ თაბაშირით, ბიტუმით ან სელის ზეთით.

დადებითი მხარეები:

• ეკოლოგიურად სუფთა – დატკეპნილი გრუნტი უფრო გამძლე და ეკოლოგიურად სუფთაა, ვიდრე სხვა სამშნებელო ტექნიკა, სადაც დიდი ოდენობით ცემენტი და სხვა ქიმიკატები გამოიყენება.
• ენერგოეფექტურობა – დატკეპნილი გრუნტის გამოყენება ხელს უწყობს შენობის საერთო ენერგოეფექტურობას.
• ცეცხლმედეგობა – მასალა კლასიფიცირებულია როგორც არაალებადი.
• ხმის იზოლაცია – დატკეპნილი გრუნტის კედლებს კარგი ხმის იზოლაციის უნარი გააჩნიათ.
• თერმოიზოლაცია – გამოირჩევა მაღალი თერმული სიმძლავრით და შეუძლია შიდა პირობების ერთგვაროვნად შენარჩუნება.
• ვიზუალურად ეფექტური – თიხიანი მიწის მუქი და ნათელი შრეების მონაცვლეობა შთამბეჭდავ სურათს ქმნის, როგორც ექსტერიერში, ასევე ინტერიერშიც.

უარყოფითი მხარეები:

• არა უნივერსალური – სამშენებლო ლოკაციაზე თიხოვანი გრუნტის არსებობას საჭიროებს.
• დამატებითი იზოლატორების საჭიროება – ცივ კლიმატურ პირობებში საჭიროებს დამატებით საიზოლაციო მასალას.
• ეროზიის საშიშროება – მაღალ ნალექიან რეგიონებში, მიუხედვად იმისა, რომ წვიმას არ შეუძლია მასალის დაზიანება, სასურველია დამატებითი გადახურვა, რომელიც ხელს შეუშლის ეროზიის განვითარებას.
• ექსპერტების ჩართულობა – ტექნოლოგიის სპეციფიკიდან გამომდინარე, დამატებითი სპეციალისტების ჩართულობამ შეიძლება პროექტის საერთო ღირებულება გაზარდოს.
• სტატიკურობა – განსხვავებით აგურის ნამუშევრისაგან, კედლის აშენების შემთხვევაში, შეუძლებელია მისი ადგილმდებარეობის შეცვლა.
• ერთგვაროვანი ფორმები – არასტანდარტული ფორმების შესაქმნელად საჭიროა დამატებითი კონსტრუქციული ჩარევა და კედლების გამაგრება.

თუ გეგმავთ დატკეპნილი გრუნტის ტექნოლოგიის გამოყენებას, ჩვენი გუნდი მზად არის დაგეხმაროთ პროექტის განხორციელებაში.

ირაკლი გოგოხია
ბიზნესის განვითარების მენეჯერი